Shree Brahma Baidarkala Garodi, Manikallu (Billadi)

ಇದೊಂದು ಆಯದ ಗರೋಡಿಯಾಗಿದ್ದು, ಪೂರ್ವಾಭಿಮುಖವಾದ ಒಂದು ದ್ವಾರವನ್ನು ಹೊಂದಿದೆ. ಇಲ್ಲಿ ಷಢಾಧಾರ ಪ್ರತಿಷ್ಠೆಯಾಗಿಲ್ಲ.
ಸ್ಥಳ ಪುರಾಣದಲ್ಲಿ ತಿಳಿದು ಬಂದಂತೆ ಕೋಟಿಚೆನ್ನಯರು ಬಿಲ್ಲಾಡಿಯ ಚಿತ್ತಾರಿಗೆ ಬಂದಾಗ ಅಲ್ಲಿ ಮೊದಲೇ ನೆಲೆನಿಂತಿದ್ದ ಹಲವಾರು ಸ್ಥಳೀಯ ಶಕ್ತಿ, ದೈವ ದೇವರುಗಳಿರುವುದರಿಂದ ಮುಂದೆ ಸಾಗಿ ಮಣಿಕಲ್ಲು ಅರ್ಬಕ ಧಾರಕೇಶ್ವರಿಯ ಆಶ್ರಯ ಪಡೆದು ಮಣಿಕಲ್ಲಿನ ಈ ಪ್ರದೇಶದಲ್ಲಿ ನೆಲೆ ನಿಂತರಂತೆ. ಆ ಸಮಯದಲ್ಲಿ ಗರೋಡಿ ಮನೆಯ ಹಿರಿಯ ಶೀನ ಪೂಜಾರಿಯವರ ಮುತ್ತಜ್ಜನ ಕನಸಿನಲ್ಲಿ ಈರ್ವರು ತರುಣರು ಬಂದು ಮಣಿಕಲ್ಲು ಪ್ರದೇಶದಲ್ಲಿ ನಿಂತಿದ್ದ ಅನುಭವವಾಗಿ ಮರುದಿನ ಆ ಸ್ಥಳದಲ್ಲಿ ಪರೀಕ್ಷಿಸಿದಾಗ ಕೋಟಿಚೆನ್ನಯರ ಪಾದದ ಗುರುತು ಮತ್ತು ಸುರಿಯ ಊರಿದ ಗುರುತು ತೋರಿ ಬಂತು. ಆ ಸಮಾಚಾರವನ್ನು ಸ್ಥಳದ ಮಾಲಿಕರಾಗಿದ್ದ ಜೈನ ಬಲ್ಲಾಳ ಸೆಟ್ಟಿಯ ಬಳಿ ತಿಳಿಸಿದಾಗ ಅವರು ಈ ವಿಚಾರ ಸತ್ಯವಾದರೆ ತನಗೆ ಕೂಡಾ ಕನಸಿನಲ್ಲಿ ಬೈದರು ತೋರಿ ಬರಲಿ ಎಂದರಂತೆ. ಆ ಪ್ರಕಾರ ಕೋಟಿಚೆನ್ನಯರು ಬಲ್ಲಾಳ ಸೆಟ್ಟಿಯ ಕನಸಿನಲ್ಲಿ ತೋರಿದಾಗ ಅವರಿಗೆ ವಿಶ್ವಾಸ ಮೂಡಿ ಗರಡಿ ಕಟ್ಟಲು ಒಪ್ಪಿಕೊಂಡರು. ನಂತರ ಸೀನ ಪೂಜಾರಿಯವರ ಮನೆತನದ ಹಿರಿಯರಾದ ಊರವರ ಸಹಕಾರದಿಂದ ಗರೋಡಿ ಕಟ್ಟಿದರಂತೆ. ಪೂಜೆ ಯಾವ ರೀತಿ ಆಚರಿಸುವುದೆಂದು ಯೋಚಿಸುತ್ತಿದ್ದಾಗ ರಾತ್ರಿ ಪೂಜಾರಿಗೆ ಕನಸಿನಲ್ಲಿ ಕೋಟಿಚೆನ್ನಯರು ಬಂದು ಒಂದು ಶ್ರೀ ಗಂಧದ ತುಂಡು ಐದು ಅಶ್ವತ್ಥದ ಎಲೆ, ಅಡಿಕೆ ಇವೆಲ್ಲವನ್ನು ಸ್ಥಳೀಯ ಹಲಸಿನ ಮರದಲ್ಲಿ ಕಟ್ಟಿ ಅದೇ ಹಲಸಿನ ಮರದಿಂದ ತಮ್ಮ ಪಾಪೆ ತಯಾರಿಸ ಬೇಕೆಂದು ಅಪ್ಪಣೆಯಾಯಿತು.