Category: ಗರೋಡಿಗಳು

ಸ್ಥಳ ಪುರಾಣಲ್ಲಿ ತಿಳಿದು ಬಂದಂತೆ ಕೋಟಿಚೆನ್ನಯರು ಕೇಂಜದಿಂದ ಎಲ್ಲೂರಿಗೆ ಬಂದು ಅಲ್ಲಿ ಗರೋಡಿ ನಿರ್ಮಾಣದ ಬಳಿಕ ಮಜೂರು ಜೈನ ಬೀಡಿಗೆ ಬಂದು ನಿಶಾನೆ ತೋರಿಸಿದ ನಂತರ ಬೀಡು ಮನೆತನದವರು ಮಜೂರಿನಲ್ಲಿ ಗರೋಡಿ ಕಟ್ಟಿಸಿ ಅದರ ಎಲ್ಲಾ ಉಸ್ತುವಾರಿಗಳನ್ನು ಅವರೇ ನೋಡಿಕೊಳ್ಳುತ್ತಿದ್ದರು. ಕ್ರಮೇಣ ಆ ಮನೆತನದವರು ನಶಿಸಿ ಊರುಬಿಟ್ಟು ಹೋದಾಗ ಗರೋಡಿಯು ಪಾಳು ಬಿತ್ತು. ಈ ಸ್ಥಳದ ಪಕ್ಕದಲ್ಲೇ ಉಂಡಾರು ವಿಷ್ಣುಮೂರ್ತಿ ದೇವಾಲಯವಿದೆ. ಈ ದೇವಾಲಯವು ಸೋದೆ ಮಠಕ್ಕೆ ಸೇರಿದ್ದು. ಒಂದು ದಿನ ಸೋದೆ ಮಠದ ಸ್ವಾಮಿಗಳು ಪಲ್ಲಕ್ಕಿಯಲ್ಲಿ ಗರೋಡಿಯ ಪಕ್ಕದ ದಾರಿಯಲ್ಲಿ ಹೋಗುತ್ತಿದ್ದಾಗ, ಪಲ್ಲಕ್ಕಿ ಇದ್ದಕ್ಕಿದ್ದಂತೆ ನಿಂತು ಬಿಡುತ್ತದೆ. ಮುಂದೆ ಸಾಗದ ಪಲ್ಲಕ್ಕಿಯನ್ನು ನಿಲ್ಲಿಸಿದವರಾರೆಂದು ಚಿಂತಿಸಿದ ಸ್ವಾಮೀಜಿಯವರಿಗೆ ಕೋಟಿಚೆನ್ನಯರ ನೆನಪಾಗುತ್ತದೆ. ಹತ್ತಿರದಲ್ಲೇ ಅಳಿದುಳಿದ ಗರೋಡಿಯ ಕುರುಹುಗಳೂ ಕಾಣ ಸಿಗುತ್ತವೆ. ಪಲ್ಲಕ್ಕಿ ಯಥಾಸ್ಥಿತಿಯಂತೆ ಮುಂದೆ ಸಾಗಿದರೆ ಗರೋಡಿಯ ಪುನರ್‌ನಿರ್ಮಾಣ ಮಾಡುವುದಾಗಿ ಸಂಕಲ್ಪಿಸುತ್ತಾರೆ. ಪಲ್ಲಕ್ಕಿ ಮುಂದುವರಿಯುತ್ತದೆ. ಸೋದೆ ಮಠದ ಸ್ವಾಮೀಜಿಯವರು ತಾವೇ ನಿಂತು ಗರೋಡಿ ಕಟ್ಟಿಸುತ್ತಾರೆ. ಪೂಜೆ ಪುರಸ್ಕಾರಗಳಿಗೆ ಜನ ನೇಮಿಸಿ ಗದ್ದೆ ಉಂಬಳಿ ಬಿಡುತ್ತಾರೆ. ಮಠದ ವತಿಯಿಂದಲೇ ಗರೋಡಿಯ ಉಸ್ತುವಾರಿ ನಡೆಯುತ್ತದೆ. ಇತ್ತೀಚಿನ ವರ್ಷಗಳಲ್ಲಿ ಗರೋಡಿಯ ಅರ್ಚಕರಿಗೆ ಗರೋಡಿಯ ಕೀಲಿ ಕೈಯನ್ನು ಹಸ್ತಾಂತರಿಸಿದ್ದಾರೆ. ಆಯಾ ಗುತ್ತು ಬರ್ಕೆಯ ಯಜಮಾನರುಗಳಿಗೆ ಗರೋಡಿ ಆಡಳಿತದ ಗೌರವ ನೀಡಿದ್ದಾರೆ. ಗರೋಡಿಗೆ ಆಡಳಿತ ಸಮಿತಿಯೂ ಇದೆ.

ಬಹಳ ಹಿಂದೆ ತೆಂಕಣದ ಮೂಲ್ಕಿ ಸೀಮೆಯ ಅರಸು ಕಟ್ಟಿಸುತ್ತಿದ್ದ ದೇವಾಲಯ ನೋಡಲು ಹೋದ ಇಲ್ಲಿಯ ಬೈರ ಗುತ್ತಿನ ಯಜಮಾನರು, ಅಲ್ಲಿ ಶಿಲ್ಪಿಗಳು ಕೆತ್ತಿದ್ದ ಮರದ ಕುದರೆಯನ್ನು ನೋಡಿ ಇದು ನಮ್ಮ ಗರೋಡಿಯಲ್ಲಿ ಇದ್ದರೆ ಎಷ್ಟು ಚೆನ್ನಾಗಿತ್ತು ಅಂದುಕೊಂಡರು. ಆ ರಾತ್ರಿ ಅಲ್ಲಿಯೇ ಉಳಿದ ಬೈರಗುತ್ತು ಯಜಮಾನರಿಗೆ ಕೋಟಿಚೆನ್ನಯರು ರಾತ್ರಿ ಕನಸಲ್ಲಿ ಬಂದು, ನಾವು ಆ ಕುದುರೆಯನ್ನು ಅಪೇಕ್ಷಿಸಿದ್ದೇವೆ ಎಂದು ಅರಸರಿಗೆ ಹೇಳುವಂತೆ ಆಜ್ಙಾಪಿಸಿದರು. ಆದರೆ ಕೋಟಿಚೆನ್ನಯರ ಮಹಿಮೆಯನ್ನರಿಯದ ಅರಸರು ಕುದುರೆಯನ್ನು ಕೊಡಲು ನಿರಾಕರಿಸಿದರು. ಆ ಕ್ಷಣದಲ್ಲೇ ಅರಸರು ಸ್ಮೃತಿ ತಪ್ಪಿ ಬೀಳುವರು. ಅರಸು ಪರಿವಾರ ಹಾಗೂ ಊರವರು ಸೇರಿ ಅರಸರ ಆರೋಗ್ಯಕ್ಕಾಗಿ ಕೋಟಿಚೆನ್ನಯರಿಗೆ ಕೈ ಮುಗಿದು ಪ್ರಾರ್ಥಿಸಿ, ಅರಸರ ಆರೋಗ್ಯ ಸರಿಯಾದಲ್ಲಿ ಕುದುರೆಯನ್ನು ಹರಕೆ ರೂಪದಲ್ಲಿ ಗರೋಡಿಗೆ ಕೊಡುವುದಾಗಿ ಹರಕೆ ಹೊತ್ತರು. ಸ್ಮೃತಿ ಬಂದ ಅರಸರು ಪಟ್ಟು ಬಿಡದೆ ಕೋಟಿಚೆನ್ನಯರು ಕಾರಣೀಕ ಪುರುಷರಾದರೆ ಈ ಕುದುರೆಯು ತಾನಾಗಿಯೇ ಗರೋಡಿಗೆ ಹೋಗಲಿ ಎಂದು ಕುದುರೆಯನ್ನು ಸಮುದ್ರಕ್ಕೆ ಎಸೆಯಲು ಆಜ್ಞಾಪಿಸುತ್ತಾರೆ. ಮರುದಿನ ಕುದುರೆಯು ಕಾಪು ಕಡಲ ಕಿನಾರೆಯಲ್ಲಿ ಗರೋಡಿಯ ಹತ್ತಿರ ಕುದುರೆಯು ತೇಲುತ್ತಿರುವದನ್ನು ಕಂಡು ಸಂಭ್ರಮದಿಂದ ಮೆರವಣಿಗೆಯಲ್ಲಿ ಗರೋಡಿಗೆ ತರಲಾಯಿತು. ಆದರೆ ಅದನ್ನು ಗರೋಡಿಯ ಒಳಗೆ ತಂದು ಪ್ರತಿಷ್ಠಾಪಿಸಲು ಗರೋಡಿಯ ದ್ವಾರವು ಚಿಕ್ಕದಾದುದರಿಂದ ಸಾಧ್ಯವಾಗದೆ, ಮರುದಿನ ದ್ವಾರ ಬದಲಾಯಿಸುವುದೆಂದು ತೀರ್ಮಾನಿಸಲಾಯಿತು. ಮರುದಿನ ಬಂದು ನೋಡುವಾಗ ಕುದುರೆ ತಾನೇ ತಾನಾಗಿ ಗರೋಡಿಯ ಒಳಗೆ ಯೋಗ್ಯ ಸ್ಥಾನದಲ್ಲಿ ಸ್ಥಾಪನೆಯಾಗಿತ್ತು. ಇಂದಿಗೂ ಕುದುರೆಯು ವರ್ಷವೂ ಗಾತ್ರದಲ್ಲಿ ಹಿರಿದಾಗುತ್ತಿರುವುದು ಇಲ್ಲಿಯ ವಿಸ್ಮಯ. ಇದೇ ಕಾರಣಕ್ಕಾಗಿ ಗರೋಡಿಯ ಮೇಲ್ಮಾಡನ್ನು ಎರಡು ಸಲ ಏರಿಸಲಾಗಿದೆ ಎಂದು ಇಲ್ಲಿಯ ಹಿರಿಯರು ಹೇಳುತ್ತಾರೆ.

ಶೇಖರ ಪರವ, ಉಗ್ಗಪ್ಪ ಪರವ ಮತ್ತು ಸಂಘಡಿಗರು ಈ ಗರೋಡಿಯ ನೃತ್ಯ ವಿಶಾರದರಾಗಿ ಸೇವೆ ಮಾಡುತ್ತಿದ್ದಾರೆ.

ಚನಿಲ ಬನ್ನಾಯ ಅಥವಾ ಸನಿಲ್ ಸಂತತಿಯ ಮನೆತನ “ನಾಯ್ಗ” ರೆಂಬ ಅಭಿದಾನ ಹೊಂದಿದವರು. ಅಲೂಪ ವಂಶ ಮತ್ತು ವಿಜಯನಗರ ಆಳ್ವಿಕೆಯ ಕಾಲದಿಂದಲೂ ತುಳುನಾಡಿನಲ್ಲಿ ಕೆಲವು ಬಿಲ್ಲವ ಮನೆತನಗಳಿಗೆ ನಾಯಕ (ಸೇನಾ ನಾಯಕ ಇತ್ಯಾದಿ) ರೆಂಬ ನೆಲೆಯಲ್ಲಿ ನಾಯ್ಗ ಎಂಬ ಹೆಸರಿದ್ದಿತು. ಅಂಥವರಲ್ಲಿ ಹಳೆಯಂಗಡಿ ಬಂಕಿ ನಾಯ್ಕ, ಉಳಿಪಾಡಿ ಗುಡ್ಡೆ ನಾಯ್ಗ, ಕಾರ್ನಾಡಿನ ಮಾಗಂದಡಿ ನಾಯ್ಗ, ಮುಂತಾದುವು ಪ್ರಖ್ಯಾತ ಮನೆತನಗಳು.

ಗರೋಡಿಯ ಬ್ರಹ್ಮ ಗುಡಿಯ ಒಳಗೆ ಗುಂಡದಲ್ಲಿ ಪಂಚಲೋಹದ ಬಂಗಾರ ಹಾಗೂ ಬೆಳ್ಳಿ ಮುಚ್ಚಿದ ಕುದುರೆಯೇರಿ ಕುಳಿತ ನಾಗ ಬ್ರಹ್ಮರ ಮೂರ್ತಿ ಇದೆ. ಗುಂಡದ ಮೇಲಂತಸ್ಥಿನಲ್ಲಿ ಗಾಳಿ ದೇವರ ಬಂಗಾರದ ಕವಚವಿರುವ ಮರದ ಮೂರ್ತಿಯಿದೆ.